Posjeta Udruženju slijepih i slabovidih za Pljevlja i Žabljak
Povodom 15. oktobra, Međunarodnog dana bijelog štapa, članovi Učeničkog parlamenta Gimnazije, u pratnji pedagoškinje Ivane Vukašinović, posjetili su Udruženje slijepih i slabovidih za Pljevlja i Žabljak i razgovarali sa prisutnim članovima o načinu života i izazovima sa kojima se ova lica svakodnevno susreću.
Zahvaljujući savremenoj tehnologiji kreirane su mnoge asistivne aplikacije koje im olakšavaju svakodnevni život, a učenicima su prezentovane samo neke od njih: aplikacija za glasovno očitavanje novca, aplikacija za identifikaciju boja i sastava tkanina, čitač teksta na više jezika, tumač fotografija, određivanje putanje kretanja, detektor nivoa tečnosti u posudama i sl.
Osim digitalnih alata, predstavljene su i neke društvene igre koje su prilagođene osobama sa oštećenjima vida. Domine, šah i pikado samo su neke od njih.
Učenici su se upoznali sa znakovnim jezikom i koristili knjige na Brajevom pismu.
Koliko je izazovno svakodnevno učešće slijepih i slabovidih lica u saobraćaju, učenici su se uvjerili kroz performans prelaska ulice sa povezom preko očiju i bijelim štapom.
Cilj ove aktivnosti je podizanje svijesti mladih o značaju stvaranja inkluzivnog okruženja i podrške kojom možemo doprinijeti sigurnijem načinu života slijepix i slabovidix osoba.
Ivana Vukašinović
